川雲追粵
山山妖
著
四川人学粤语上篇
粤语600常用词随身记
粤语600常用词记住末啊？跟住落嚟我哋开始粤语常用600句……
第一课
1、早晨。你食咗早餐未啊，等阵一阵你点样返工啊？
我啱啱先起身，仲未嚟得切嚟唔切食啊，等阵我搭地铁返公司。
2、你喺边度呀，返到公司未，我而家喺东风路好塞车啊！
我啱啱出咗地铁，就快到公司楼下，好彩我今日搭地铁。
3、都就嚟九点啦，点解你仲未收工嘅，使唔使咁搏啊？
冇计啦，鬼叫你穷咩，而家搵食艰难啊！
4、听日周末，终于可以瞓返个晏觉，下昼去睇电影好唔好？
好啊，记得今晚先买好飞，听日我仲想食小龙虾啊！
5、烂瞓猪，热头都晒罗柚啦，仲唔快啲起身食饭？
瞓过龙添，呢次大镬喇，我仲约咗班friend（朋友）去踢波。
6、明仔，我部手机唔知去咗边度，你有冇睇见过啊？
你啊，真係大头虾，肯定係攋咗喺办公室冇攞啦！
7、四大天王同台演唱，真係好难得，黎明好靓仔啊。
谂返起就好似寻日噉，好怀念嗰个年代嘅青春岁月。
8、真係唔好意思啊要你哋等咗咁耐，我就快到喇。
你乜嘢回事啊，次次都係你做完咪么，喇喇啉快脆啲啦。
9、 好耐冇见，哩排你觉得点样啊，我好挂住你啊。
都係我唔好，唔好再嬲喇，原谅我好唔好？
10、都就嚟12点啦，点解仲唔瞓觉？听日又唔知醒喇！
早知就唔饮嗰杯咖啡喇，成晚眼光光等天光。
第二课
11、你哋吹咗成晚水，有乜嘢开心事啊，讲嚟听下。
聼讲隔篱屋张师奶个孙，三岁就识得返讲番鬼话，好醒目啊。
12、你喺度发紧乜嘢牛豆，仲唔快啲，成村人等紧㗎。
唔好意思啊，即刻就可以搞掂，保证唔拖后腿。
13、你又係嘅，山草药咩你估噏得就噏，惗真先好讲啊嘛。
对唔住啊，我错咗啦，第日唔会噉样嘅啦。
14、点解你拿埋块面，係个
粤语600句
厅度腾来腾去，发生咗乜嘢事啊？
寻日我俾信息佢，到而家都未覆我，唔知係唔係仲嬲紧我？
15、你成日谂住攞人著数，因住偷鸡唔到蚀揸米。
咪唔记得，周郎妙计安天下，赔咗夫人又折兵。
16、讲真嗰句，你有冇后悔过，果阵时嘅选择？
如果可以嘅话，我会买多一张船飞，同你一齐离开呢度。
17、如果你锺意我，咁啱我又锺意你，不如我哋一齐啦。
如果你唔想，你可以话俾我知，你知道，我会等你噶。
18、快啲嚟啊，呢度有隻曱甴，好核突啊。
有冇咁得人惊啊，咪就係一隻小强嗻，等我嚟搞掂佢。
19、做乜嘢又擒到咁高啊，仲冇快啲落嚟，太牙烟啦。
我屋企隻猫俾吓亲，跳咗上树，我要抱佢返落嚟啊。
20、老窦你好孤寒啊，一个月先比一佰蚊零用钱，有啲炆水啊。
衰仔包，读书唔见你咁勤力，比啲心机读多啲书啦。
第三课
21、下昼去咗边度玩啊，搞到成身邋邋塌塌，成个污糟猫咁。
我同隔篱屋明仔去咗河边捉泥猛（泥鳅），可惜一条都捉唔到啊。
22、我朋友话有份工好啱我啊，每日做六个钟，月薪十万。
边有咁大隻蛤乸随街跳啊，你都唔睇下自己係乜嘢koli（能力）
23、你明明係已经错咗喇，点解仲要死鸡撑饭盖啊。
做人最紧要係拎得起放得低，你再噉样我会嬲噶！
24、仲唔行快啲，都就嚟迟到啦。聼讲今日老师会点名。
最衰都係我啦，唔记得较闹钟，累得成宿舍都唔知醒。
25、今日係乜嘢日子啊，点解整咁多好餸。仲开埋红酒添。
傻猪，你真係无记性，今日係我哋结婚十周年纪念日啊。
26、你煮啲餸好和味啊，食到我舐舐脷，你啲手势真係正斗。
为食猫我睇你食到唔知饱，係唔係食过返寻味咧？
27、喂，你喺度做紧乜嘢啊，得唔得闲啊，过嚟饮早茶啦。
我啱啱先起身，我等阵就过嚟，你开好位等我啦！
28、你哋两个啊细细声，係度倾乜嘢计啊，一唔係我哋去行街啦。
你话事啦，啱好我哋好耐都冇一齐行街买野睇电影啦。
29、你可唔可以话畀我知，你个心到底係点惗嘎，锺意我定系憎我。
其实我自己都唔知道，我好挂住你，但又好怕见到你同佢一齐。
30、你几好吖嘛，你喺边度呀，好耐冇见你，得唔得闲出嚟食饭啦。
我喺北京路行街，你而家方唔方便出嚟，食完饭一齐唱k啊？
第四课
31、小朋友你係唔係蕩失路啊，你屋企喺边度啊？
小朋友唔使惊亦都唔使喊啊，爸爸妈妈一阵就嚟架啦！
32、仲唔快啲执好间宿舍，老师都就快嚟啦，迟啲就嚟唔切喇。
我都唔记得呢回事啦，我一个人揦手唔成势，你帮下手啦！
33、话你又冇听，明知系错嘅，都仲要咁做，真係死牛一边颈。
唔好嘥气啦，仔大仔世界，路係佢自己拣嘅。
34、你成日耷低个头睇手机，我真係好闭翳你嘅眼同颈椎。
你唔好嫌弃妈咪吟吟沉沉，我睇见你咁样，真係忍唔住。
35、你千祈唔可以为过海就神仙，做人有问心无愧先得嘎。
做人做事最紧要系对得住自己嘅良心，过得自己过得人先至得。
36、老窦大佬同家姐虾我啊，佢哋瓮冧我啲积木。
老窦，细佬恶人先告状，係佢先抢我哋嘅公仔书。
37、你做乜嘢头耷耷眼湿湿噉嘅样，话畀老师知，发生咗乜嘢事。
佢哋几个夹埋嚟一齐虾我，仲收埋我嘅书包。
38、呢排有啲唔开心，惗住睇啲喜剧片，有乜嘢好嘅推荐下啊。
睇下星爷啲电影啦，又鬼马又搞笑，包保你笑到咔咔声！
39、咁多年以嚟，你觉得有乜嘢电影能够畀你好大嘅触动啊。
《肖申克的救赎》同埋《当幸福嚟敲门》呢两部肯定走唔甩鸡。
40、你唔通唔知咩，人哋讲嘢时係度站乱歌柄，係好唔礼貌嘅咩。
唔好意思，我有啲心急啊，第次唔会噉架啦！
第五课
41、你哋快啲嚟睇下，花花嗰个轮轮尽尽（笨手笨脚）嘅样，好得意噶。
你都未见过七仔同萌兰嘅百厌同奀皮（捣蛋），睇见都想打佢哋嘅罗柚！
42、受到台风嘅影响，成晚都横风横雨，冇乜嘢事就唔好出街喇。
今次真係落雨大水浸街喇，聼讲全市嘅学校都会停咗课。
43、弊家伙，唔记得带锁匙出门添，今次大镬喇。
真係大头虾，都唔係第一次啦，点解你咁鬼冇记性架？
44、你唔使喺度扮晒嘢喇，你做嘅嗰啲嘢，我冚唪唥知道晒。
咁多年以嚟我冇待薄过你，你点解要做金手指笃我背脊。
45、毕咗业之后，大家都冇几何见面，唔知道佢而家点样呢。
聼讲佢前几年结咗婚，仲生咗对好得意嘅孖仔。
46、衰仔包都咁大个仔喇，仲唔快啲帮手洗衫煮饭。
都係时候返屋企做啲嘢啦，唔可以成日衣来伸手，饭来张口。
47、你要因住啊，咪睇佢憨居居噉，其实都唔知几叻。
睇人唔可以净係睇表面，有啲人係面懵心精架。
48、老窦，听朝早你得唔得闲呀。陪我去公园滑雪屐好唔好？
噉你今晚仲唔早啲瞓觉，早睡早起身体好啊。
49、聼讲陈师奶果仔考咗北大，好犀利啊，谂谂我哋嘅衰仔，诶。
人比人比死人，佢已经好落力啦，你唔好再畀压力佢。
50、我搞掂埋手头啲嘢就过嚟喇，不如你哋等埋我啦。
你都唔睇下而家系几点，等到你嚟都蚊瞓喇！
第六课
51、今日返工攰唔攰啊，快啲嚟饮啖茶唞下先啦。
本嚟係有啲攰嘅，不过睇见你同啲细路就唔攰啦。
52、老窦我唔喺屋企，你点解煮咁少餸啊。唔可以咁悭架。
老窦唔係悭，主要係年纪大机器坏胃口唔似以前啊。
53、快啲帮手度下桥。等阵老师就过嚟，迟啲就嚟唔切喇。
边度会有计啊，边个叫你净係挂住打机，唔做功课。
54、公司喺度查紧财务经理，聼讲佢负责嘅项目食水好深。
真係抵死啊，自己亲戚嘅公司都够胆穿柜桶底。
55、衰仔包一个人出门在外，记得要小心学识执生啦。
老窦寻晚你同妈子都吟沉咗成晚喇，唔使咁长气啦。
56、人哋新同事第一日嚟，你点可以成日眼甘甘噉昅住人哋啊。
你都嚟睇下，唔通你唔觉得佢真係好似大明星咩？
57、我有啲唔舒服，可能係感冒啊，你得唔得闲帮手买啲药？
天气咁鬼冻，琴晚仲冲冻水凉，梗係会冻亲喇。
58、你几时变得好似个残鸡婆噉架。仲嚟我公司发晒烂渣。
你都黐线噶，争我钱唔还仲大条道理，我真係识错你啊！
59、都仲未到九点，你点解打晒喊路啊，係唔係好眼瞓。
你仲好意思讲，琴日你啲鼻鼾声，搞到成宿舍无觉好瞓。
60、你乜嘢回事呀，上边蒸松糕，下边卖凉粉，慇住冻亲个膝头哥。
妈子，噉你就唔明啦，哩个係今年嘅流行款式。
第七课
61、佢嘅人缘咁好，工作能力有唔，错点解会畀人炖冬菇（降职）嘅？
你唔通唔知道人怕出名猪怕肥咩，树大招风啊！
62、今日好冻啊，降咗差唔多十度，不如今晚打边炉。
好啊，不过我想食鸳鸯镬，因爲我唔似你噉样啲得辣！
63、佢好犀利啊，赶走咗上门搞事嘅嗰几个地踎烂仔。
聼讲佢细个时拜高人为师，食咗十几年夜粥（功夫）嘎。
64、你成嚿番薯噉，咁简单都唔识做，真係生嚿叉烧都好过生你。
妈子咁我都冇计嘎，边个叫我乜嘢都似晒你喔！
65、寻晚12点你做乜无啦啦俾电话我倾上次嗰单嘢。
我后来惗惗，我哋仲係返嚟公司三口六面讲清楚好。
66、唔该借借，我要在前边啊，我下个站就落车喇。
一唔係你等阵先，太逼啦，我想郁都郁唔到。
67、都已经入秋啦，仲係咁贵翳焗（闷热）。一啲都感觉唔到秋凉。
你以前唔通冇听啲老人家讲过，秋老虎其实仲得人惊啊。
68、唔该晒啊，如果唔係你，今日我就赶唔切呢班火车喇。
唔使客气我都係啱啱好顺路，第次记得提前啲出门啊。
69、又偷鸡辣你，上班时间行嚟行去，因住老细炒你鱿鱼。
辉哥，下次唔敢啦，我而家即刻返去做嘢。
70、放咗假咁耐，点解唔搵啲同学仔出去耍下啊。
考试成绩仲未出嚟，我个心成日都啰啰孪（坐立唔安），冇心机玩啊。
第8课
71、唔知道附近边度有士多我惗住同羊城通充值。
行前几十米行过马路之后转左就有一间七仔啦。
72、唔该问下附近边度有洗手间，小朋友就嚟忍唔住喇。
喺商场三楼电梯口嘅左手边就有喇，你哋行快两步喇。
73、好耐冇见，得唔得閑过嚟倾下计啊，我啱啱买咗啲新嘅茶叶。
好啊今晚收工就过嚟，我都带啲靓茶畀你试下。
74、老窦，妈子，隔篱屋明仔又呃左我一隻棍仔糖。
嗰个马骝精，成日讲大话呃人，你又唔係唔知道。
75、妈子隔离屋嘅苏虾成日喊，真係好嘈啊。
你细个时都成日喊啊，要识得换位思考，相互体谅。
76、妈子，我哋返嚟啦，好肚饿啊，有咩野食啊。
你哋几条化骨龙，成日顾住擒高擒低，除咗玩就係食。
77、哩几日街口嘅走鬼到好多田螺卖啊，平时好似都唔见有。
你唔通唔知道过几日就係中秋节喇咩，听日我哋都买啲嚟应节。
78、妈子，你买啲柑桔好鬼死酸啊，酸到盲公都开眼啊。
问你老窦啦，话你细个时锺意食，都唔睇而家係唔係时候。
79、妈子早晨，今日你着呢条连衣裙真係好靓啊。
衰仔包，快把口越来越识氹人，不过妈子锺意听。
80、你咁好声线，如果唔学唱真係嘥晒啦。
我都好锺意唱歌，不过我妈佢唔锺意我读艺校。
第九课
81、咁多年老同学，得闲耐唔耐一齐出嚟饮餐茶啊。
班长你系个班群度吹鸡就得啦，我哋听你嘅安排。
82、厨房真係太污糟啦，等我嚟执下嗰橱柜入边嘅砂煲罂罉。
妈子，好声啲啊，都係等我嚟喇，我惊你打烂晒啊。
83、小张，冇我嘅签名，做乜嘢你自把自为将啲货装上车。
唔好意思，我请咗成个礼拜假，唔知道新嘅出货流程。
84、阿娇，你真係惗住晏昼求祈食啲嘢就得啦。
係啊，早晨食得多得滞，仲未饿，晏昼是但食啲就得啦。
85、你哋几个百厌星成日系度搞搞震冇帮衬。
妈子，你应承过我哋做晒作业就可以自由安排嘅嚄。
86、你话你为啲仔女做咁多，仲得唔到佢哋嘅理解值得咩？
你唔通唔知道为人父母大部分都係有自唔在攞苦嚟辛啊。
87、明仔几时同雪儿拍拖噶，聼讲雪儿的脾气好难服侍嘅嚄。
上个月就一齐乜你唔知道阿明仔好识氹女仔开心嘅咩。
88、佢做乜嘢成个蒸生瓜噉，讲嘢乱七八糟冇牛头唔搭马嘴。
佢懵盛盛架周不时都会噉样讲嘢，唔经过大脑嘅。
89、到就嚟下昼三点啦，事头婆今日点解仲未返嚟？
你惗住出粮係唔係，放心啦，佢实会翻嚟噶。
90一个人系出边住，唔好餐餐叫外卖，记得煲啲汤水饮啊。
妈子，我识得照顾好自己嘅啦，你唔使挂住啊。
第十课
91、十几年冇见啊，喺楼下撞见老张，聼讲你喺楼上饮茶。
老同学毕业后咁多年冇见，惗到係广州见返你，真係太好啦。
92、老细，九号台唔该埋单，一共几多钱，有冇折头啊？
同你打八折啦，连埋酒水一齐冚唪冷係两万三千四百五十六蚊七毫八。
93、你啊真係好细心，好锡你老婆啊，佢真係有福气啦。
係我好彩啊，俾我遇啱佢，我先至係最有福气。
94、你唔通唔知道随便枕垃圾倒地下係好唔文明嘅咩。
唔好意思啊，我即刻执返佢擗落垃圾桶。
95、我睇你脸色唔係咁好，不如去医院做个检查啦。
呢段时间有啲唔舒服，我啱啱惗住搵个中医嚟得返剂（看一看）。
96、妹猪，爷爷同你去饮早茶，食咗啲乜嘢好嘢啊。
乾蒸、烧卖、虾饺、肠粉、排骨、风爪好好食啊。
97、你都打晒冷震，猛咁打乞嗤，仲唔快脆啲著多件衫。
天气咁鬼冻，冷衫都唔着，好容易冻亲感冒架。
98、头赤赤咁，仲觉得有啲怕冷，唔知道系唔係发烧呢。
寻晚你间房嘅空调开到咁大，可能係冻亲感冒啊。
99、妹头，落班早啲返嚟，一齐去爷爷嫲嫲度过节。
你哋行先，我收工直接过去，我公司离爷爷嫲嫲屋企好近。
100、无论几时都好，有需要帮手嘅话，记得随时搵我。
唔该晒啊，哩个世界上真係得你先至会噉样帮我。
第11课
101、爱情就好似一对鞋啱唔啱着，浄係得自己先知道。
其他人净係会睇对鞋靓唔靓，其余嘅係唔会睇到。
102、今晚嘅聚会点解见唔到佢噶，班长你冇通知佢咩？
佢啱好出差啊，要下个月先返嚟到时候再联繫。
103、呢排你係唔係好忙啊，信息次次都係过咗好耐先复。
唔好意思，我有啲忙，我惗过不如我哋大家都冷静下。
104、你应承过我，係我唔开心嘅时候，你会氹我噶。
梗係会氹你啦，你啲细路仔脾气我仲唔了解咩？
105、都话耳听为虚，眼见为实，你觉得係唔係真係咁样嘎？
等你大个啲，你就知道哩个世界啊真真假假虚虚实实。
106、嫲嫲成日话，唔干唔净，食咗冇病，真係噉样嘅咩。
老人家好多时候都会噉样讲，不过小朋友仲係要注意卫生。
107、你呃我膝头哥唔食辣椒酱啊，你悭啲啦你。
我谂唔到你真係黄皮树鹩哥——唔熟唔食啊。
108、仔仔，出嚟做嘢你要记住，食得咸鱼抵得渴。
仲有就係，做人要向前睇，选择咗就唔好后悔。
109、仔仔，做人千其要记住，冇咁大个头唔好戴咁大顶帽。
妈子，知道啦，我都咁大个仔啦，识得执生（见机行事）嘅啦！
110、衰仔包，你间房立立咁乱，仲唔趁放假咋咋霖执下佢。
妈子，我都咁大个啦，我间房你都唔好理啦。
第12课
111、你唔通唔记得，我咁大个仔，就憎就係人哋呃我嘅啦。
你仲加埋其他人一齐呃我，就算係为我好，我都会好嬲。
112、你做乜嘢瘦咗咁多嘅，你千祈唔好要靓唔要命啊。
大家咁话啦，同上次见面比起身，你都瘦咗好多，你都要注意身体哦。
113、你知道架，我唔会忘记过去，但亦唔会谂住以前。
我明白嘅，你唔会忘记我，不过你亦唔会再挂住我。
114、我知道有好多嘢我俾唔到你，所以我冇理由留低你。
其实你心入边应该好清楚我要嘅并唔係呢啲。
115、好羡慕有啲人，能够係啱嘅时候遇到左啱嘅人。
不过人生无常可能会係啱嘅时候遇到咗错嘅人。
116、你饿唔饿啊，我煮碗麵畀你食，好不好。
好耐冇食你煮嘅面啦，记得加蛋同香肠啊。
117、如果你真係决定分手，唔该你分得彻底啲乾净啲。
你知道架，我嘅性格係最憎人啲做嘢拖泥带水，一啲都唔果断。
118、做人呢最紧要係开心，唔好成日揦口揦面啊。
你谂下饮啖茶，吔个包话，话咁快就又一日喇。
119、衰仔包，今次衰咗唔紧要，下次记得要争返啖气。
你要记住，做人乜都可以输，信心唔可以输。
120、世界上有好多嘢，真嘅假唔嚟，就好似爱情噉样。
唔锺意嘅人，夹硬喺埋一齐，到最后都仲係会分开。
第13课
121、你咁鬼招积，口无遮拦，见一镬打一镬啊。
做人记住要低调，千祈唔好得罪人多称呼人少啊。
122、妹猪啊，你锺意食乜嘢生果呀，老窦落班买畀你食。
碌柚，鸡屎果，士多啤梨，奇异果我都好想食啊。
123、明仔你今日真係好彩喇，冷手执个热煎堆啊。
仲係要多得你啊，如果唔係你我都冇机会嚟呢度。
124、你呃鬼食豆腐咩，讲嘢冇句真嘅，我有咩可能信你。
你谂清楚，再噉样落去，我哋连朋友都冇得做。
125、你仲唔快啲关火，你睇下锅底都就嚟烧穿窿喇。
我今日感冒鼻塞，煲窿咗都闻唔到，好彩你喺度。
126、我啱啱谂住打电话返屋企，先睇见部手机冇晒电喇。
我呢度咁啱有部旧手机，一唔係（要不）你攞去顶住档先。
127、一文一斤鸡，一蚊一斤龟，究竟系鸡贵定系龟贵。
128、各个国家有各个国家嘅国歌。
129、一文一只龟，七蚊一隻鸡。佢话龟贵过鸡，我话鸡贵过龟。
130、明仔嚟公司仲未到三个月，做咩升得咁快嘅。
做乜嘢你唔知道呀，佢係公司出咗名嘅擦鞋仔。
第14课
131、聼讲喺单位做又36会唔做又係36。
你咪成日谂住偷鸡，做嘢要对得住你个份粮。
132、呢次真係弊弊都冇咁弊啦，屋漏偏逢连夜雨啊。
放心啦，车到山前必有路，船到桥头自然直。
133、你讲嘢禀神都冇句真啊，畀个良心你当狗肺啊。
我点敢呃你啊，畀个水缸我做胆都唔敢啊！
134、老窦我出尽八宝，不过点样都搞佢唔掂。
尺有所短寸有所长，要识得搵人帮手。
135、我出差先几日，点解变到七国咁乱？你收唔到风咩，总监带住成个团队过档（跳槽）竞争对手啊。
136、你老窦做乜嘢，吹须碌眼嘅，你激嬲咗佢啊？
关我乜嘢事啊，係肥猫打泻的牛奶，落佢部电脑度。
137、你粗身大势就唔好四周围行囉，记住食多啲营养嘢啊。
咁都唔可以成日坐住唔喐啊，仲有营养均衡就得架啦。
138、老窦出边做咩嘈喧巴闭嘅，啱啱瞓著就比嘈醒。
有几条友饮大咗，喺小区楼下开演唱会啊。
139、你匿埋边度啊，成班同学打啰咁搵都唔见你。
唔好意思啊，我晨早就去咗图书馆度睇书。
140、马上就嚟够钟返工你哋仲係度打咩野牙铰啊。
我哋係度倾紧就嚟上映嘅电影，聼讲男主角好靓仔。
第15课
141、你睇下佢噉招积样，不过又吹佢唔涨，真係激气。
努力提升自己，凭着实力超越佢，咁先至係最好嘅回应！
142、仔仔，千祈唔好做老好人，噉样好容易俾人虾架。
你要记住，善良系有底线嘅，唔可以俾人搓搓圆揿扁，要识得拒绝。
143、妹头，听日就寄宿啦，床铺被席都执好晒未啊。
妈咪，你已经啽唚啽咗好几次啦，都执好晒啦！
144、两公婆边有隔夜仇噶，都係床头打交床尾和。
拍拖嗰阵时同而家比起身，真係蚊肶同牛肶。
145、老世，我冇入个办公室攞嘢，我係俾人屈架。
你係唔係俾人切生猪肉（诬陷），我哋会调查清楚嘅。
146、老窦，我掂都冇掂过细佬，佢就喊起身啦。
老窦，家姐佢虾我，佢要我将啲零食畀晒佢。
147、明仔长命功夫长命做啊，冇可能咁快就做晒噶。
我知道喇，不过我嘅性格就係乜嘢都惗住快脆啲搞掂。
148、强哥你又系度车大炮，你冇可能入去嗰度。
兄弟你铺话法有戒（你可不能这样说）喇，等强哥带你见下世面。
149、老窦妈子，家姐玩游戏嘅时候成日出猫仔。
妹头，玩游戏唔能够噉样，唔可以虾细佬。
150、老窦，楼下张师奶话爷爷係读书人，好犀利噶。
咁梗係啦，爷爷旧阵时曾经到过几年卜卜斋（私塾）
第16课
151、你千祈唔好搏咁尽啦。挨坏身子就得不偿失啊。
我知道嘅啊，搞掂呢份计划书我就唞返几日。
152、我啲广州话真係唔标准平时我都唔敢讲。
怕乜嘢，我啲普通话都係唔鹹唔淡我都做啊样讲！
153、记住，喺公司唔好咁牙擦，千祈唔好行差踏错。
唔该晒啊，我会因住嘅啦，做好自己嘅份内事。
154、忘记一个人如果真係咁容易，你就唔使咁鬼攰喇。
你要知道，爱情哩样嘢，易入难出啊！
155、你哋乜嘢都唔使劝我啦，我就係锺意佢一个。
就算佢咩野都唔好，不过呢个係我自己拣嘅。
156、每次我行过呢条巷仔嘅时候，我都会谂起你。
记得中学嗰阵时，我哋穿过巷仔一齐返学。
157、你几耐冇返屋企喇，得闲记住多啲返去睇下啊。
唔使等到搵到钱，因为爸爸妈妈净係希望你平安健康。
158、今日阳光灿烂，不过你冇嚟，我嘅心忍唔住落雨。
你唔好噉样啦，我会肉赤嘅啊，我听日就赶返嚟！
159人生每行一步都要谂清楚，因为冇后悔药卖。
你讲得好啱，人生如棋，落子无悔！
160、只要你俾啲心机，落力啲，就唔会係咁嘅样啦。
老师我记住喇，第日我会认真学习嘅啦！
第17课
161、妹猪，仲唔放低手机，快啲瞓觉啦。
而家就算后生，不过成日顾住捱夜，身体点顶得顺啊！
162、你有冇听师兄讲过，高三啲老师成日拖堂啦。点止拖堂啊，高三的体育老师仲成日屋企有事。
163、人生嘅成功源自于我哋嘅坚持同唔放弃。
人生嘅失败，亦离唔开盲目坚持同唔识得放弃。
164、你做乜嘢笑到煠熟狗头咁嘅样，有乜嘢开心事啊。
今日人事通知我加人工呀，收工一齐饮返两杯。
165、妹猪你食嘢咁鬼死奄尖，边个服侍得你啊。
妈子冇计啦，边个叫你煮啲餸咁骨子（精致）又好食。
166、大家一齐出嚟食饭你点餸就唔好咁撩冷（刁钻）喇。
放心啦今日係老世特登邀请我哋嚟试食架！
167、你玩嘢啊，我跑咗咁远嚟搵你，你话搞错咗！
唔好意思啊，我打唔通你电话，搵唔到你啊！
168、你係乜嘢新鲜萝蔔皮啊，做乜嘢仲要咁拣择。
妈子，如果冇啱我嘅，咁我宁愿做箩底橙哪！
169、你今日做乜嘢啊。点解行路趷下趷下。
啱啱落楼梯嘅时候唔小心差错脚拗咗柴啊！
170、明仔，你喺阳台趷高嘅脚尖睇乜嘢啊。
快脆啲执好间宿舍，值班老师行紧嚟唎边！
第18课
171、妹头等阵啲衫洗完咗记得要揈（fing）干先晾。
嫲嫲，放心啦，而家啲洗衣机都係全自动噶。
172、明仔，你做乜突然间踎低发生乜嘢事啊？
老师行紧过嚟啊，午休时间出嚟玩唔可以畀睇见。
173、妈子，我做乜嘢踎低起身见头晕嘅？
噉有可能係佢起身太急，大脑供血唔足！
174、你做乜嘢都係咁多即食麵返学校，太过桠埞（占地方）吧。
仲有记住食少啲即卸面冇营养啊！
175、衰仔包，牀底下堆满晒着嘅袜，搞到间房葾崩烂臭。
仲唔快啲趁周末放假喺屋企好好地执下间房。
176、妈子，你做咩唔敲门直接翁门入嚟噶。
下次唔可以咁样伽，就算係屋企人都要敲门噶！
177、你放心啦，我哋男人老狗牙齿当金使噶。
华哥既然你都噉讲，咁我就信晒你喇！
178、妹猪，都大个女啊，你睇下佢间房係唔係有啲屈质。
一唔係得闲装修下间房，将佢间房整得阔落啲！
179、妈咪冇口齿啊，话过带我去玩，而家又唔去喇。
今日妈咪临时有事，听日我哋一齐带你去游乐场。
180、湿湿碎啦，大家都咁熟，唔使计较咁多啊。
噉样啊，等哩啲嘢搞掂晒，得闲出嚟食饭饮茶！
第19课
181、妹猪你女仔之家点可以更巴巴咋咋噶。
你再噉样大癫大肺，因住第日嫁唔出去啊！
182、晨早流流，你做乜嘢打晒喊露，唔够瞓啊。
寻日爬白云山，今日又咁早起身，又攰又眼瞓啊。
183、老窦广东嘅四大名山係边几个啊。
罗浮山，丹霞山，鼎湖山，西樵山
184、分左手咁耐，我哋已经冇拉冇愣，唔好再搵我啦。
既然係噉样，做乜嘢你寻晚无啦啦响我手机？
185、无论遇到乜嘢难事，记住千其唔好一个人死顶。
要记住唔论乜嘢时候，屋企人都係你坚强嘅后盾！
186、昌哥，今日开茶话会，你做乜嘢著到咁骑呢。
等阵我上台表演节目，所以咪着成噉样囉。
187、从来未见过好似你咁奀皮嘅，做作业都喐身喐世。你再係噉百厌唔听话，今个礼拜就唔去游乐场喇！
188、佢男人老狗，做乜野打隻针都要嗌生嗌死。
你唔知道啊，听护士话佢会晕针晕血，
189、妈咪，哩排成日加班觉得好似有啲热气哦。
等妈子执翻剂凉茶俾你饮，好快就会好嘅喇。
190、华哥，拎住个箧，出去旅游啊。
係吖长假啱啱结束，错锋出行舒服啲。
第20课
191、准备食饭喇，嫲嫲整咗你最锺意食嘅白切鸡。
嫲嫲，等我同爷爷捉埋呢盘棋就嚟喇。
192、你寻晚加班到咁夜，都冇地铁啦，点样返去嘎。
我老窦嚟公司楼下等我，一齐搭地铁返屋企。
193、张经理当众落你面，我哋仲同唔同佢合作。
你要记住今日嘅嘢，做人能屈能伸，傍实力讲嘢！
194、咁大个人啦，日日瞓到黄朝百晏，唔觉得丢架咩。
妈咪，好唔容易先放长假，你等我瞓个晏觉啦！
195你做乜嘢啊，等咗你好耐啦，差唔多成个钟咯噃。
唔好意思啊，落班先临时开会，我而家喺半路啦！
196、唎排有啲烦，想听歌放鬆下，有乜嘢推荐架。
不妨听下小凤姐嘅《顺流逆流》，我都好锺意哩首歌。
197、近排你做乜嘢啊，睇上去成个人都落晒形嘅。
呢段时间加班有啲多，我都觉得头嚟顶唔住喇！
198、啱先真係险过剃头啦，嗰部电单车争啲就害亲你。
下次过马路睇下两边，唔好顾住耷低头睇手机。
199、马上就落班啦，你噉样临急临忙，边个嚟得彻做。
唔好意思啊，帮帮手，个客临时加单噶！
200、可唔可以阻你一阵啊，我部手机突然间冇晒声。
等我嚟睇睇，有冇可能係你唔小心教咗静音啊！
第21课
201、出边翻风落雨，记得带遮，注意安全啊。
妈咪，知道喇，我已经提早放咗落个包度。
202、已经等咗足足成个钟，仲未嚟，真係离晒大谱啊。
唔係你估，佢不嬲都係咪咪摸摸立立糯糯架喇！
203、呢排点呀，好耐冇见，同学聚会都唔见你。
麻麻地啦，又唔係噉样，而家冇乜嘢事都懒得喐！
204、妹猪你托住个腮，係度惗紧乜嘢啊。
我喺度谂紧，唔知道妈咪今晚整咗乜嘢好餸啊！
205、屋企唔係讲道理嘅地方，赢咗等于输咗。
要有人先认低威，并氹返对方，家和万事兴啊！
207、我未见过你，都唔知你係边个，同你三唔识七嘅。
你乜证件都冇，有乜嘢事你嗌物业上来讲啦！
208、你唔通唔知道，顾客係我哋嘅米饭班主咩。
今时今日你点可以用咁样嘅服务态度？
209、妈咪，你知唔知道啊妹猪最惜嗰个就係你啊。
你啊，成日就识得卖口乖，不过妈子锺意听！
210、佢做乜嘢咁鬼犀利嘅，百足咁多爪，乜都识啊？
你唔唔记得有咩？人哋係天才中嘅天才，精英中嘅精英！
第22课
211、妹猪，出门出门之前，咪太过姿整，唔好次次都叫人等你。
知道喇，妈子你都想妹猪着到靓靓噉出去係唔係？
212、听佢平时好缩骨，好似铁公鸡咁一毛不拔架。
虽然佢有啲孤寒，不过佢从来唔会去搵人著数。
213、你明知道我唔係呢个意思，做乜嘢你仲要捉字虱？
你唔通唔知道合同入边每一个字嘅重要性咩？
214、都就嚟考试喇，仲唔好好地温书，你咪买大安旨意（别唔当回事）。
老师知道喇，我哋会畀心机温书嘅喇！
215、老世，你睇佢脑笋都未生埋，坐得稳呢个位乜。
所以话你后生细仔唔识睇人佢係扮猪食老虎嘎！
216、呢部车医返都嘥药费啦，买部新嘅仲著数。
谂谂你讲嘅都几啱嘅，噉你帮我留意下啦！
217、呢份合同真係好湿滞（麻烦），裏边嘅附加条款好多。
大家记住对呢份合同一定要打醒12分精神！
218、你放心啦，我就算捞再唔掂，都唔会嚟黐你金糠（沾你嘅光）。
我势（真係）估唔到，我哋咁多年兄弟竟然会变成噉样！
219、呢件事唔可以俾佢知道，唔係嘅话会穿煲架。
放心啦，除咗佢自己成公司都知道你锺意佢。
220、你点解唔讲嘢嘅，你咪话我知你呷醋啊。
你唔好嬲啦，咪咁小气啦，好唔好？
第23课
221、今日天气咁好。不如我哋一齐出去wet（玩）。
好啊，我哋快啲行啦，唔好嘥时间啦！
222、你唔使遮遮掩掩啦。你哋拍拖哩件事系公司早就通晒天啦！
其实拍拖咁开心嘅事，使乜嘢收收埋埋（隐藏）啊！
223、我部手机好似神神吔噉，你帮我睇下係乜嘢回事。
你打开太多窗口啦，你关咗佢重启一下手机就得嘅喇！
224、冇阴公咯，嗰班衰人将阿婆佢哋搞到鸡毛鸭血。
第日我哋都要多啲抽时间陪下屋企嘅老人！
225、呢排你点解经常吞炮嘅，返工仲成日瞌眼瞓。
唔好意思啊，近排成晚都瞓唔著，我唔会再蛇王啦！
226、听老师讲你最近好奀皮，经常喺学校撩事斗非。
佢哋恶人先告状，係佢哋夹埋一齐撩我先嘅！
227、妈咪肥猫匿埋边度啊，成个下昼都唔见佢。
你揭开张被睇下，佢肯定喺被窦入边瞓觉！
228、老窦我返嚟喇，今日嚟落厨啊，今晚有乜嘢好餸啊。
今日老窦整做你最锺意食嘅白切鸡，三杯鸭同红烧肉。
229、你冇鬼用啊，一有人嚟就粒声唔出，仲加住条尾走佬。
妈咪，你唔好话肥猫喇，你都知道佢不嬲都细胆嘅啦！
230、呢单嘢比上次嘅仲杰（糟）。我担心我哋冚唔住啊。
冇计喇，我哋已经尽晒力喇，顺其自然啦！
第24课
231、妹猪今晚降温好犀利，瞓觉记住冚好被。
仲有啊，今晚会翻风，瞓觉前记住要收衫啊！
232、聼讲你冇做嘢好耐，哩度虽然唔多，攞去使住先。
多谢晒，攞返去啦，你都唔容易啊，我而家仲有穀种食住。
233、放工返嚟攰唔攰，快啲去沖个凉先。
我今日煲咗老火靓汤，一阵沖完凉试下够唔够味！
234、唔係啩，呢次数学期中考咁鬼难，你都可以满分。
成年级就得你一个满分你真係好犀利！
235、妹猪好心啦你，唔好咁鬼为食啊！
成个假期唔见你温书，净係识得揽住部手机同零食！
236、我睇你嗰样有啲唔妥，咁啵，快啲讲发生咗乜嘢事。
我同佢表白啊，不过佢一直冇覆我，我个心囉囉挛啊！
237、你有冇觉得阿美有啲唔係好似其他嘅女仔。
佢啊，虽然普通不过好襟（耐看）睇，而且越睇越好睇！
238、衰仔包你啱出嚟做嘢，等老窦教你做人嘅道理。
记住要脚踏实地唔怕蚀底，噉样份工先至襟捞（长久）
239、大家记住该悭就悭，该使就使，唔可以乱嚟。
唔係嘅话，到时候公司执笠大家一镬熟啊！
240、你睇下佢个样，做乜苦瓜干咁面口，发生咗乜嘢事。
前嗰排嘅项目冇对接好，搞到而家一身蚁啰！
第25课
241、妈咪，楼下开咗间新超市，聼讲啲嘢平靓正。
噉样啊，等阵食完饭，我哋一齐落楼去超市行下。
242、以前冇俾心机读书，而家点样博都好难有出头之日。
哩个就係少壮不努力，老大徒伤悲啊！
243、明仔米行住啊，唔该帮我攞唎份文件比经理。
好啊，等阵得唔得闲啊，一齐饮下午茶。
244、晏昼饭堂嘅矮呱同薯仔好难食，我想食你煮嘅餸喇。
老窦今晚嘅红烧肉记住要放多啲芫茜同葱啊！
245、好耐冇食蕹菜啦，行过市场嘅时候买啲返嚟食下。
蕹菜（通心菜）耐唔耐食下就可以，记住唔能够食太多啲！
246、人哋点样讲唔紧要，关键嘅係你要睇佢点样做。
要记住，有啲人好多时候係讲一套做一套嘅。
247、唔好太在意人哋係点样讲嘅，因为每个人嘅立场唔同。
想开心就要学啲睇开啲，学识唔计较，学识求同存异。
248、衰仔包，你睇下你啲书甩皮甩骨，一啲都唔似读书人。
仲有啊你啲字做乜嗲到鬼画符噉，边个睇得明？
249、佢哋两个感情唔係一直
几好嘅咩，点解突然定煲嘅。
聼讲两个嗌交啊，一个谂住早啲结婚，一个谂住出国深造！
250、点算好啊，马上就嚟结束喇，到而家仲未有结果出嚟。
唔使心急，要记住好戏在后头，宝物沉归底啊！
第26课
251、妹猪，你都唔细啦，你打算几时同明仔拉埋天窗。
妈咪，你急咩野喔，人哋仲谂住陪多你几年啊。
252.好心啊你，咁鬼骨痹（肉麻）嘅话，你哋两个返房慢慢斟啊。
我怕咗你哋啊，我返房啦，费事（免得）做你哋嘅电灯胆。
253.我同佢分数一样，大家都咁高咁大。做咩嘢佢係我前边。
你哋总分虽然一样，不过人哋嘅主科分数比你高啊。
254.你买之前无研究同考察过市场行情嘅咩。
如果你乜都信晒佢，咁你好可能渣都冇得剩。
255.一世人两兄弟有需要嘅话，昧水舂墙，在所不辞。
唔理点样都好，你能够噉样讲，我已经好安慰。
256.对唔住啊，今天我一时火遮眼，失去理智，乱噏廿四。
其实我都有唔啱，我唔应该疑神疑鬼发晒豪狼戾（无理取闹）。
257.新嚟嘅助理做得点样啊，值唔值得培养一下。
而家睇起身仲唔错，好抵得惗（任劳任怨）仲唔怕蚀底。
258.上次我对住流星许咗个愿，唔知道会唔会实现呢。
我哋即管努力去做就得啦，剩低嘅就顺其自然啦。
259.弊家伙，合同唔记得带出嚟添，今次大镬啦。
我哋先过去嗰客嗰度，我嗌明仔即刻开车送过嚟。
300.寻晚你係唔係又捱夜啊，你睇下你乌眉瞌睡嘅样。
琴晚挨咗成晚，将销售计划赶咗出嚟，真係好攰。
第27课
261.新人啱啱接手，有啲倒泻箩啊，你要多啲帮下佢。
得啦，知道啦，我会睇住佢嘅啦，放心啦。
262.你激嬲咗佢啊，今次又嚟大剂（麻烦）啦，快啲惗办法氹返佢。
一唔係你买紮花去接佢放工，睇下可唔可以补镬。
263.讲开又讲（顺便说下），等阵明仔出嚟，大家记住当乜事都冇发生。
今日嘅嘢，明仔自己都唔想，大家就唔好怪佢啦。
264.飞哥聼讲今年生意唔错啵，猪笼入水啊。
都係各位街坊俾面成日嚟帮衬啊。
265.聼讲两个人如果有缘，咁就会千裏姻缘一线牵。
不过如果冇缘嘅话，咁就肯定大缆都扯唔埋啦。
266.聼讲佢虽然已经离职，不过留低咗好鬼多苏州屎（麻烦嘢）。
係囉，搞到而家大家一齐嚟同佢执手尾。
267.前个排唔係早就嗌你提前d都好考前复习嘅咩。
你而家先嚟临阵磨枪，你觉得仲嚟得彻咩。
268.老窦做乜嘢我间房度有咁多糖果同公仔嘅。
妹猪，哩啲冚棒唥都係你嘅儿童节礼物，锺唔锺意啊。
269.琴晚我系收音机度听到咗徐小凤嘅故乡嘅雨。
我突然间好挂住屋企，所以今日我惗住请两日假。
270.明仔你对细个时印象最深刻嘅嘢係乜嘢。
应该係担凳仔去隔离屋度睇大侠霍元甲。
第28课
271.妹猪今日係幼儿园听唔听话有冇曳曳啊。
梗係冇曳曳啦，老师仲奖励妹猪一朵小红花。
272.我而家先知道你先至係哩个世界上对我最好嘅人。
可惜我年少无知，唔识得珍惜，错过左咁好嘅你。
273.你等咗佢三年，我都等咗你三年，点解你唔俾机会我。
对唔住啊，你知道㗎，我嘅心除咗佢冇人能够入得去。
274.有啲嘢我想问你好耐啦，但係又觉得有啲唔好意思。
其实你觉得我係好人定係衰人，你心入边係点惗嘎？
275.出咗嚟做嘢咁耐啦，仲係捞成噉样，真係有啲惭愧。
每个人都有属于自己嘅人生，只要尽咗力就得啦。
276.明仔，项目已经开始咗一段时间，你点睇啊。
我觉得承包方喺合同嘅细节执行上有啲小动作。
277.你咪睇佢俾你咁鬼多甜头，你如果贪心就领嘢（上当）喇。
佢会一步步嚟氹你落踏，到后边就一次过起你尾注。
278.其实我哋两个都冇错，只不过係爱上咗唔该爱嘅人。
希望下次我哋再见面嘅时候，心入边能放低彼此。
279.我有啲奇怪，哩度咁多人，你做乜嘢会拣啱我嘅。
我都唔知道点解第一眼睇到你就觉得好熟悉。
280.唔知点解，呢隻雪糕我食左咁多年仲係咁锺意食。
你食嘅唔单止係雪糕喇，仲
有细个嗰阵时嘅回忆。
第29课
281.大家可以埋位食饭啦，今日整咗好多好餸啊。
今日究竟系乜嘢日子做乜搞到九大簋（gwai2）啊。
282.寻晚陪个客出去食饭，续约嗰单嘢倾好未啊。
个客嘅要求真係好撩唥（挑剔），好彩到最后都倾掂晒。
283.公司楼下嘅超市今日周年庆，啲嘢好抵买啊。
既然咁著数，咁我哋快趣啲去采购，啱好下个礼拜开年会。
284.你唔使讲喇，知道你巴闭喇，我哋冇乜嘢好倾喇。
你返去摄高枕头惗下，惗下你啱先讲嘅嘢。
285.嗰个靓仔好熟口面，好似喺边度见过，不过一时谂唔起身。
你唔记得了乜，上个礼拜佢仲黎过我哋公司洽谈业务。
286.阿美，你乜嘢回事啊，点解个身喐嚟喐去嘅。
我喺度挠痕啊，你唔觉得今日办公室度好多蚊嘅咩。
287.你点解咁耐都唔嚟搵我啊，你係唔係唔想见到我。
我就嚟要出国留学啦，我怕见到你会改变主意。
288.你仲係唔够细心，你再睇真啲，呢次睇到未啊。
今次睇到啦，啱先冇睇清楚，眼大睇过龙（看偏）啊。
289.咁好嘅女仔，去边处搵，你要识得珍惜啊。
知道啦，我会好好地对佢噶，你放心啦。
290.你都唔知道，啱先我都想搵窿捐，好丢架啊。
怕乜嘢嚄，你想追女仔就要胆大心细脸皮厚。
第30课
291.琴晚你哋咁多人出去食饭，最尾係边个埋单架？
寻晚我哋食完饭仲去创造去咗唱k，都係辉哥睇数架。
292.你一日到黑，米冇事搵事，噉样你会好攰噶。
你要记住，世上本无事庸人自扰之。
293.妹猪啊，你唔使诈瞓啦，您嘅手机屏幕仲著住。
妈咪，今日礼拜六，你畀我睇多阵视频啦。
294.巴闭喇你，今日嘅股东见面会你攞晒彩啦。
飞哥你咪噉讲啊，呢啲都係你教导有方啊。
295.下昼领导过嚟检查，记住做得好好睇睇。
放心啦，我会搞掂嘅啦，唔会令你难做嘅。
296.你嗌佢好好地谂清楚。
你讲得啱，我返去之后会好
好地同佢倾下。
297.阿美，听日你要又要去相睇啊，呢个月都好几次啦。
我都唔想啊，妈子个个礼拜都安排，烦到烦死喇。
298.老窦，今时今日，你唔可以一本通书睇到老噶。
你讲嘅都有道理，睇嚟老窦要多啲跟你哋啲后生学习下。
299.阿妹你觉得呢两件大褛边件好睇啲。
横睇掂睇我始终都係觉得嗰件粉色嘅啱你多啲。
300.寻晚我成晚都训唔著，心入边惗住细个时嘅嘢。
讲真啦我真係好羡慕嗰啲碌低就可以训着嘅人。
第31课
301.梁伯睇起身好开心喎，准备去边度啊。
啱啱约咗班老友记去广州酒家饮早茶啊。
302.你好啊，我而家仲未落班呀，唔该你将快递畀楼下嘅大叔就得喇。
好嗱，噉你记住早啲返嚟攞，因为呢个係新鲜冻品嚟嘎。
303.聼讲你个细路毕咗业了哦，佢而家喺边度返工。
佢啱啱搵咗间公司实习，听佢讲等积累的经验就出嚟创业。
304.明仔，点解佢先嚟咗一个月就可以升职加薪。
人哋明白老细嘅心思，仲识得托大脚你识咩。
305.今日娇姐同佢老公嚟过，仲带咗啲手信嚟。
娇姐次次都係咁客气嘅，过两日约佢哋出嚟饮茶。
306.明仔上次嗰单嘢后尾係边个孭镬嘎。
仲使讲乜嘢，你惗惗都知啦，除咗佢仲会係边个。
307.你唔使呃我喇，你心入边惗住边个，你好清楚。
你睇你台上边嘅相，手机嘅墙纸，边一样冇佢。
308.得闲先再倾下，我急住返屋企煮饭，小朋友就嚟放学啦。
好啦，惗清楚后俾电话我，我等你嘅答复啊。
309.靓仔，你咪行住啊，你嘅银包跌咗喇。
唔该晒啊，好彩得你啊，我嘅证件都係裏边。
310.你对佢咁好，我真係惗唔到佢竟然会咁样对你。
以前佢唔係噉样嘅人，真係势估唔到佢会变成噉样。
第32课
311.明仔，一场嚟到咁难得，点解唔食埋饭先走。
如果唔係突然有事要返去，我都想同你倾多阵。
312.记住你应承过我，去到外地每日都要比信息我。
仲有，每日瞓觉前记得畀电话我，因爲我好挂住你。
313.聼讲北方开始落雪喇，一唔係（要不）今年我哋去东北过年。
东北虽然有暖气，不过仲係好冻噶，你身体顶唔顶得顺啊。
314.同你一齐咁耐啦，我仲係觉得对你唔够了解。
因为你一直以嚟都冇介绍我畀你啲朋友认识。
315.都咁大个仔啦，点解做嘢仲係咁嚟纹路㗎。
妈咪你好长气啊，成日就喺度啽啽唚唚成。
316.我唔记得带手机同羊城通，你借啲散纸我搭车。
呢度係100文散纸同几个银仔，你攞去用住先。
317.佢哋两个喺埋一齐咁耐，做乜嘢突然间掟煲嘅。
佢哋两个唔知係边个想唔要细路，所以咪分开咗落。
318.妈子，寻日讲嘅嗰啲嘢，你买齐晒未。
香枧枧粉洗头水沖凉液应该都齐晒啦。
319.妈子，呢啲野都係买畀你同老窦噶。
妹猪，你睇你使钱好似大花洒咁，要悭啲啊。
320.你两公婆做乜嘢咁迟噶，大家等左你哋好耐啦。
真係唔好意思，部车半路死咗火，好唔容易先赶过嚟。
第33课
321.衰仔包你咪有一啲啲成绩就牙擦擦噉。
记住係出边唔好懒啲咁。你咁招积好易俾人打架
322.梁伯唎个係畀你嘅赠品，多谢你成日嚟帮衬！
你咪咁讲啊主要係你哋嘅野平靓正嗻！
323 如果你嚟唔切睇傍晚嘅夕阳，不妨睇早上嘅朝霞。
我係话你唔好太过执著，你其实仲有其他嘅选择！
324 大家都几张嘢喇，边个唔攰，不过係难得讲嗻。
边个唔想好好地唞下，不过为咗屋企人一定要坚持落去！
325 啱先办公室度做乜嘢静英英嘅，蚊滋飞过都听得见。
你唔知道啊，董事长同总经理啱啱係办公室入边。
326 辉哥，我哋睇你头噶喇，你话跟住落嚟点样做。
而家最紧要係冷静，一定要睇定啲，先再做打算！
327 今次真係爆冷门哪。谂唔到佢哋竟然赢咗比赛。
你唔知道啊，呢个月佢哋每日放学都训练两个钟头。
328 你点解仲唔将啲嘢攞返嚟，咪唔记得啊。
迟啲啦妈子，横掂仲有排都唔会用到。
329 真係势估唔到，佢提出噉样嘅要求，我去搵佢。
你咪乱嚟，大不了第日我哋唔同佢合作！
330 都咁夜啦，佢做乜嘢仲喺图书馆度温书。
你又唔係唔知道，佢不溜都係咁勤力嘅喇！
第34课。
331 老窦家姐唔係真係喊哪。佢係诈家依（扮嘢）啊。你哋两个百厌星係唔係又係度争玩具？
332 你话我唎个老毛病点样先可以断尾。
记住斋口，规律作息，坚持锻炼就得嘅喇！
333 阿美周末得唔得闲，一齐出去游水啊。你哋咪预我啦，我唔得闲，要陪屋企人出去玩。
334 嫲嫲天口咁兴，你就返屋企凉空调喇。你哋啲后生唔明白嘅啦，深静自然凉啊！
335 做乜慌失失咁。出咗乜嘢事，唔使急，慢慢讲。
明仔同东仔喺操场上打起身啦，你快脆啲去睇下。
336 妹猪，听老师讲，你近排学习好勤力嚄。
妈子马上就高三喇，我好想考到中山大学啊！
337 就嚟够钟喇，再唔起身就迟到喇，仲唔快啲啊浪口洗面。
你睇你日日都拖到最后，次次都唔折被！
338 今日好似有啲冻，一唔係今晚喺屋企打边炉。
好啊，我落班去超市买啲火锅料同饮料。
339 娇姐，食咗饭未呀，个日头咁大你去边度啊。
嗰个衰仔，玩到老窦姓咩都唔知，饭到唔返屋企食！
340 唔好意思啊，我唔係特登噶，我买隻新嘅俾你啦。
你咪放喺心上，嗰支笔嘅墨水已经用晒嘅啦！
第35课
341 妹猪，你睇你柜桶入边都係零食，正一为食猫嚟架。
妈子你话有边个女仔系唔识零食噶，你细个时都係噉样啊。
342 老窦沖凉房嘅灯，好似坏咗喔唔係啊。
灯管都黑晒啦，老窦等阵买新嘅返嚟换就得架啦！
343 你喺边度啊，我睇唔见你嘅，你过嚟步行街哩边。
我係广百门口，我而家行过嚟喇，马上就到。
344 就嚟放暑假喇，你想唔想去学游水啊。
好啊，妈咪，我都想快啲学识游水！
345 明仔你下昼去咗边度，数学老师四周围搵你。
我同宿舍嘅同学去咗踢波，我而家去搵老师。
346 你应该知道，我真係好难做，你唔好搵我做磨心啦。
我都唔想，不过哩啲事，唔搵你我仲可以搵边个？
347 妈子我好颈渴啊，冰箱嘅可乐点解唔见咗。
妈咪用嚟整咗可乐鸡翅，你先饮啖妈子煲嘅汤啦！
348 嫲嫲冚唪冷有几多只鸡公几多隻鸡乸。
佢哋先啱啱出壳，等佢哋再大啲先可以睇得出！
349 明仔，睇落有啲嘛对路，仲係快脆啲走喇。
好彩得你提醒，如果再迟少少，我哋都返唔到嚟。
350 落班早啲返屋企，今晚呢场波有睇头。
好啊不如约埋明仔佢哋一齐出去睇。
第36课
351 仔仔，出黎做嘢要有担戴先得，唔可以求其是但架。
老窦知道喇，放心啦我会畀心机做嘅喇！
352 陈老师，点解舞台上嗰啲人着到咁鬼奇呢。
因为佢哋喺度踩排小品，所以咪着到咁怪鸡（奇葩）囉！
353，你係唔係又俾人搵笨啊，你睇都买咗啲乜嘢返嚟。
係囉，畀几个人围住唔停咁讲，晕坨坨咁就买咗喇！
354 梁伯过生日，成村人都嚟，真係俾面啊。
呢个都係因为梁伯德高望重，平时有乐于助人！
355 老世为咗快啲做晒，都落手落脚嚟做啦。
我睇下你哋仲好唔好意思成日谂住偷鸡！
356 妈咪，细佬唔听话，又係度扭计啊。
你同老窦氹下佢先，妈咪仲係半路塞紧车。
357 你唔使诈傻扮懵嗱，成公司都知道嗰件事係你做嘅。
我真係惗唔到你竟然係噉样嘅人，我真係识错你啦。
358 阿娇落班得唔得闲，一齐去食烧烤点啊
啱饮晒下午茶，仲未落嗝（消化），一唔係听日啦！
359 明仔乜嘢回事，转性啊，学习越来越用功。
係啊聼讲佢好想考入中山大学嘅中文係。
360 琴日我好似係小区嘅网球场度见到你。
嗰个係我嘅孖生兄弟啊，我寻日成日都喺屋企。
第37课
361 几个月冇见，近排觉得点样，係度忙紧乜嘢啊！
麻麻地啦，又唔係噉上下，冇乜嘢变化。
362 今日嘅餸记得飞下水再炒，噉样先好食。
仲有，牛肉已经调好调好晒味，放喺冰箱入边。
363 我寻日係超市买返嚟嘅花生米放咗喺边度。
我等阵准备整凉拌，惗住炒的花生米。
364 聼讲你下个月准备出国，係唔係去旅游啊。
我仔仔考到咗国外嘅大学，我係陪太子读书啊。
365 明仔今次考试觉得点样，有几大把握。
今次我感觉非常好，班级前三係实食冇钱啊
366 唔好意思啊，寻日冇搞卫生搞到宿舍被扣分。
今次陀衰家喇，下个礼拜嘅宿舍卫生我包晒！
367 梁伯你睇你笑口噬噬噉，乜嘢事咁开心啊？
等阵班老友记过嚟搵我，一齐去唱粤曲啊。
368 阿美，唎样嘢睇落唔错噃。
你睇唔出佢哋係夹埋一齐嘅咩，佢哋喺度扯猫尾（串通一起）啊！
369 明仔，你唔好俾佢哋吓亲啊，佢哋係抛你浪头啊。你如果已经谂清楚并做好计划，噉就放等噉去做啦！
370 你噉都唔敢讲，真係冇鬼用，正式无胆匪类。
喺佢面前就会脸红耳热，我都唔知点解。
第38课
371 复试嘅嗰两个只能够二选一，我哋拣边个好。
我觉得嗰个周身刀冇张利嘅，可能冇咁合适！
372 有啲人你好声好气同佢讲係冇用架。
对嗰啲挜挜拃拃嘅人，一定要揸正嚟做。
373 今日礼拜六，你话今日边个洗碗。
一唔係我哋嚟睇猜呈寻（石头剪刀布），边个输咗边个洗碗！
374 老窦，哩度变化太大，都争啲到认唔出嚟喇。旧阵时呢度都係平房，而家都係高楼大厦。
375 天口好兴啊，一唔係我哋去买隻畀雪条食下。
你帮手买多几隻返嚟，我暂时行唔开啊！
376 佢点解咁鬼犀利，老世啊想要乜嘢佢都佢都能提前准备好。
你嚟咁耐喇，仲未发觉咩，佢呢个人啊眉精眼企架！
377 你唔使夹头夹髻（点头点脑）啊，你一定要真係明白先至好。
千祈唔好唔懂装懂，噉样到考试时就大镬喇！
378 梁伯今日好冻啊，咁早就去买餸啊。
係啊今日过冬早啲去买啲新鲜嘅！
379 老窦再等多阵我坐嘅车埋站啦。我行李比较多，会慢啲出嚟，你咪心急啊！
380 飞哥，今日着得好靓仔啵，惗住去边度啊。
下昼去学校开家长会啊，所以咪执正啲囉！
第39课
381 张经理，下昼检查团过嚟，会场准备得点样？
放心啦，我已经执得好好睇睇企企理理（整整齐齐）啦！
382 你哋有冇发觉阿美同苏珊真係孖公仔噉啊。
你唔知道咩，聼讲佢哋两个係好姐妹嚟架！
383 哩个杯几好，硬净（结实）又襟用，嘛嘛一定会锺意。
你讲得几啱噶，老人家都锺意用噉实净嘅嘢！
384 嗰件事实情係乜嘢回事，我听过好几个版本。
佢哋个个都係捕风捉影，实际根本就係咩事都冇。
385 你做乜嘢一碌木噉，一啲都唔识变通，我真係服咗你喇。
我都好想帮你，可惜超出我能力范围，真係唔好意思啊！
386 你睇下佢冇嚟搭霎（漫不经心）噉嘅样。你谂清楚再交畀佢。
一年冇见，冇谂到佢竟然会变成而家噉嘅样！
387 虽然仲有排先至期末考试，不过唔可以放松架。
仲有就係，下个月嘅文理分科要好好地惗清楚！
388 嗰种形象，哩个礼拜大大话话，都发生咗十几次。今晚技术部嘅同事加一定要将原因搵出嚟！
389供应商宁愿违约都要升价，今次大件事喎。
真係谂唔到合作咗咁耐，一啲情面都唔畀！
390 唔使问阿贵啦，除咗佢仲有边个会做噉嘅事。
你讲嘅都啱嘅，的确净係佢先至可能会咁做。
第40课
391 佢好似唔开心，拿埋块脸，心事重重噉嘅样。
聼讲佢上个月嘅报表搞错咗，而家周身蚁啊！
392 你点解一下子就认出佢系张经理嘅仔仔。
你冇发觉呢佢生得同钟经理成个饼印噉。
393 你点可以捏到出汁噶。乜嘢家务都唔做？
你如果仲係再咁样落去，我唔睬你噶！
394 你睇你成日杞人忧天，正式冇嘢搵嘢！
你要记住啊，人一世，物一世，健康开心最紧要！
395，我睇得出你冇可能搞掂嗰两个百厌星！
係囉，喺佢哋两个面前我係一戙（办法）都冇！
396 梁伯。你插住桃花嗰个花樽，真係好靓！
你眼光唔错播，一下字就睇出嚟，你係识货嘅！
397 妈咪，我魂精嗰度有啲疼，点算好啊？
係唔係又头晕啊，一唔係我哋去医院睇下！
398 老窦，我踢波嘅时候，唔小心屈亲只脚。
老窦先同你卒啲药酒，睇下能唔能够消肿止痛！
399 你哋两个奀皮鬼。成日系度搞搞震，係唔係身痕啊？
再係咁百厌唔听话，因住你老窦返嚟藤条炆猪肉！
400 梁伯，去泮溪饮茶啊，聼讲嗰度好他条嘅噃。
係啊，班老友记都锺意去嗰度倾计饮茶！
第41课
401 你都打横（蛮不讲理）嚟嘅，我从来未见过好似你噉样嘅人。
唔单止发烂渣，仲乱噏廿四，发晒狼戾！
402 阿妹，你睇嗰个人出场时做乜嘢咁鬼架势嘅？
403 你要谂清楚先好应承人哋，千其唔好下巴轻轻。
知道喇我应承得佢，一定可以做到嘅！
404 今日嘅金桔有有啲酸微微，冇寻日妈咪买嘅甜。
咁梗係啦，寻日妈咪买嘅係四会沙糖桔！
405 瞓醒未啊，我哋已经开好晒茶位，都係度等你。
你做乜嘢次次都唔知醒，我真係服咗你啦！
406 你睇到深夜喇，一阵嚟揸车送阿妹返屋企。
仲落紧雨，记住唔好开太快，注意安全啊！
407 明仔唔使考虑咁多喇一于咁做啦！
你要知道，好多时候困难都係我哋想象出嚟嘅！
408 睬佢都傻啊，你冇睇到佢冇将你放喺心上嘅咩。
你要知道再咁样落去嘅话，你会好痛苦架！
409 好激气啊，月底迟到咗一次，搞到全勤奖无左啦。
咪噉劳气啦，你都唔想，边个谂到地铁会出问题！
410 阿美，点解晨早流流瞌眼瞓，寻晚好夜瞓啊。
係吖，琴晚饮咗杯咖啡，搞到成晚都瞓唔著！
第42课
411 妈咪，你睇苏虾仔有两个酒凹，真係好得意啊！
你唔记得啊，你细嗰时嘅酒凹同佢一模一样。
412 你咪睇小佢，人哋唔单止係学霸，仲精通嗰种种乐器。
咁鬼犀利啊，睇嚟人不可貌相，海水不可斗量。
413 今次冻过水啦，马上就够钟喇，点样都嚟唔切啦。
边个嗌你点样叫都唔起身，今次你只能自己搞掂啦！
414 聼讲明仔喺出边到处懒叻（炫耀）噉讲公司的嘢。
话过佢好多次，就係唔听人劝，唔知道佢点样谂嘅。
415 你今日嚟呢度，你係嚟攞景定係赠庆。需要你嘅时候，从来都见唔到你，你而家嚟做乜嘢？
416 妹猪，妈咪买咗件冷衫你睇下啱唔啱你。
呢个咪就係我上次话过嘅嗰个款，真係好靓噶。
417 老窦，我立定心肠喇，一定要搞掂呢件事。
係啊已经拖咗好耐，唔能够再拖喇！
418 突然落大雨，好似得你，唔係嘅话就淋湿晒啦。
朝早出门前妈咪特登提醒我记得要带遮！
419 唔忿气啊，噉你仲唔的起心肝做得似样一啲。
你要好好地谂清楚，係时候改下你嘅臭脾气啦！
420 呢件事啊，只能够得啖笑啊，啊，唔使放喺心上。
你唔通睇唔出，呢件事由始到终，就係个笑话！
第43课
421 你嘅细佬做乜噉饮择食，咁样会营养不良架。
话过佢好多次啦，就係唔改，一啲青菜都唔食！
422 点解多咗几千蚊，係唔係搞错咗，快啲攞返去。
呢个係利息嚟嘎，就算系两兄弟都要数还数路还路。
423 生活好难两全其美，往往都係顺得哥情失嫂意。
冇计啦，人生哪能多如意，万事只求半称心。
424 点解呢度万山遍野都係藤蔓，係唔係有啲多得滞。
係啊，呢种藤蔓对环境冇乜
嘢要求好粗生噶。
425 你成世都係咁老实嘅，怪唔知成日俾人虾。
你未听过咩，人善天不欺，简单一个道理。
426 今次嘅比赛聼讲，要求好高，唔知道我哋有冇资格参加。
你要记住，我哋一定要凭实参加，千祈唔好眼中做手脚。
427 你唔知道啊，佢呢个人啊，向来都係算死草（斤斤计较）嚟架。
原来係噉样，我真係惗唔到睇落去一啲都唔似。
428 发生咗乜嘢事，君子动口不动手，佢哋点解喐手喐脚。
你睇清楚啲，你冇睇见咩，佢哋係度拍紧电影啊！
429 上星期嗰件事，而家进度点样？礼拜六记得要搞掂。
飞哥你放心啦，已经搞咗七七八八，唔会有问题嘅！
430 阿美开会是乜嘢回事，讲嘢一啲都唔似平时。
今日同经理突然嚟参加会议，我有啲紧张啊！
第44课
431 好彩你嚟咗，唔係嘅话，我揦手唔成势啊。
唔使客气我横掂得闲，早啲嚟倾下偈都好！
432 寻晚同学聚会，你做乜嘢缩埋一角，唔同大家倾下计。
唔知点解，我搵唔到以前返学嗰阵时嘅嗰种感觉！
433 你觉得今日嘅三杯鸭味道点样好唔好食。
好食到冇得顶啊过两日我中想嗌埋朋友一齐嚟。
434 辉仔唎个人点一样啊，听人哋话佢嘅品性几好嘎。
点讲好呢，湿水棉花冇得弹，相处下你就知道喇！
435呢件事俾你搞到乌哩单刀（一塌糊涂），而家都唔知道点样收科。
一唔係我搵飞哥帮手，聼讲佢以前撞啱过噉样嘅嘢。
436 你带咁少乾粮，我担心唔够啊，听日先可以落山啊。
你就放心啦，冇事嘅，呢个呢个压缩饼乾好顶肚饿！
437 你有冇睇见嗰个戴住金丝眼镜嘅靓仔。真係奇怪，佢啱先仲喺呢度，眨下眼就唔见咗。
438 咁多大咖系哩度，你点解仲好意思口水花喷喷架。
你都唔睇下呢度係乜嘢场合，下次记住醒定啲。
439 你睇佢做嘢熟行缩到咁嘅样，经验一定好丰富。
你讲得冇错，佢係呢个行业做咗十几年啦！
440 河滩上嘅人做乜嘢都执埋啲嘢冇鞋挽屐（慌忙）走？
你听唔听广播系度讲紧，上游马上就开闸放水。
第45课
441 夜麻麻喇，仲咁冻，你喺出边嶽高头睇乜嘢啊？
我喺度谂紧天上有几多星星係度望住我哋！
442 你著到花哩花碌，等阵老人家可能又有嘢讲喇。
人哋讲嘅听下就得架喇，自己点样舒服点样嚟！
443 哩单野，闲闲地都要几个月先可能搞掂！
冇谂到睇上去咁简单嘅事都要咁耐！
444 闸住，你乜嘢都唔使讲喇，我哋冇乜嘢好倾嘅。
你返去先将之前应承嘅事搞掂之后我哋再倾！
445嗰个苏哈仔嘅手仔脚仔都喐嚟喐去，好得意啊。
係啊，哩个时候嘅牙丫仔係最趣致同好玩嘅！
446 你哋两仔爷喺房入边做乜嘢，准备食饭啦。
妈咪，等我哋捉埋呢盘象棋好快就出嚟！
447 你乜嘢回事，煲咗咁耐电话粥，都足足成个钟啦。
你咁大声讲嘢，唔通唔知道会影响人啲嘅咩！
448 你睇下你成个污糟猫咁，去咗边度玩啊。
一日到黑四周围趯，搞到成身邋邋遢遢！
449 你唔使卖花讚花香啦，边个唔知道佢係你嘅侄女。
噉梗係啦，不过佢真係好唔错，举贤不避亲啊嘛！
450 呢次真係错有错著啦，冇谂到会咁桥（巧）啊。
边个谂到平时睇唔上眼嘅嘢会发挥噉样嘅作用！
第46课
451 今日天气预报话会落雨，出门前记住收衫啊。
因为跟住落嚟成个礼拜都係回南天。
452 你有冇发觉今年流行古老当时兴啊。
噉梗係啦，传统文化有佢独到嘅艺术魅力。
453 新年快乐啊，祝你身体健康，万事如意，一帆风顺。我都祝你今年生意兴隆，财源广进，猪笼入水啊！
454 飞哥，睇嚟今年生意唔错啵，赚到盆满钵满啦。
呢个就要多谢大家嘅努力喇，今晚一齐出去食饭！
455 你哋唔好贪得意喇，有啲嘢係唔能够随便喐架。
你放心啦，我哋知道啦，唔会令你难做嘅！
456 办公室乜嘢回事，做乜乱晒笼嘅，发生乜嘢事。
寻日唔记得关窗，夜晚返颱风，所以咪变成噉样囉！
457 你睇你，千拣万拣，拣得个烂灯盏。
妈咪哩个係我自己拣嘅，我锺意就得喇！
458 老细，呢次点解唔同佢哋合作，佢哋嘅价格几好啊。
你唔通冇睇见，前几次嘅合作，佢哋有时冇乜口齿。
459 呢个仲使讲咩，边个都睇得出佢哋肯定有景轰（秘密）。
你哋係唔係谂多咗，聼讲佢哋先啱啱识咗冇几日！
460 就嚟七点啦，人客嚟齐未啊，宴会就来开始了嚄。
都嚟得差唔多啦，话俾经理知，七点准时上菜。
第47课
461 妹猪，都咁大个女喇，仲同老窦诈娇。
不过唔做晒作业，係无可能睇电视嘅！
462佢做乜嘢走得咁急架，啲嘢都未执好就走咗喇。
你唔知道呀，佢啲嘢俾识穿咗，所以咪走夹唔唞咯。
463 佢哋下个礼拜嚟唔嚟呢个真係话唔定噃。
噉样啊，不过无论点样，你都要搞掂呢件事。
464 衰仔包，你睇你唔嗲唔吊嘅，让人哋点会锺意你啊。
妈咪，我嘅事你又等我自己嚟喇，你就唔好理喇！
465 你睇你洒手兼拧头，睇嚟你一啲都唔感兴趣。
你都唔睇下呢件事有几牙因，边个会去做！
467 睇你牙尖嘴利嘅样，估计喺出边冇人敢虾你啊。
做咗几年嘢，俾人虾得多左，慢慢变成噉样。
468 听陈师奶话，路口新开咗间超市，啲嘢又平又靓啊。
噉著数啊，下昼我哋去行下睇下有冇啱嘅。
469 你哋村口榕树头好似日日都咁多人，好热闹啊。
天口兴啊，好多伯爷公同伯爷婆锺意出嚟倾计！
470 我觉得你仲係将呢啲嘢都攞埋上车，噉样稳阵啲。
你讲得几啱，佢係大头虾嚟噶，冇乜嘢记性。
第48课
471 你咪一直起势噉讲，你要试下听听佢嘅解释。
有时候我哋要学识聆听先得，要知道讲多错多啊！
472 我劝你唔使嘥气啦，佢唔会听你讲架。
佢几时变成噉嘅样噶，我点都惗唔到！
473 呢件事点可能咁短时间就搞掂，肯定有问题。
不过如果唔係行内人，係冇可能睇得出嚟嘅！
474 你都唔知道，你啱先嘅样真係好肉紧（投入）啊。
睇落去你好似就係电影裏边嘅男主角噉样！
475 飞哥搞掂呢单嘢易个借火喇，包喺我身上。
你咪下巴轻轻，要知道呢啲嘢可大可小！
476仲使乜讲啊，一于噉定啦，听日我去搵佢。
你一个人去我有d无放心，我叫埋明仔一齐去！
477 衰仔包，你乜嘢回事，好似隔夜油炸鬼噉？
后生仔，要精神啲，唔可以一日到黑成坺烂泥噉。
478 都噉明显喇，仲使我我画公仔画出肠（清楚）咩。其实我知道架，我只不过係谂住呃自己多一阵！
479 你咪提佢嗱，讲起佢我就把几火。
你都唔知道，交代咁鬼耐喇，佢仲未做晒！
480 讲真嗰句（讲实在嘅），我个心十五十六，冇乜嘢把握！
如果唔係你我係唔会主动参与呢件事嘅！
第49课
481 太多嘢做喇，到七彩咁噉，饮啖茶都冇时间。
呢两日有啲忙，等出晒货我哋唞返两日。
482 苏珊，你有冇睇见明仔，佢正话（啱啱）仲喺呢度。
有人嚟搵佢，佢哋而家应该仲係会议室度！
483 就噉样喇，係咁上下就得啦。我哋先嚟测试一下。
唔可能一次就全部搞掂，我哋边测试边改进！
484 明仔有冇睇见苏珊，今日佢有冇返工司。
朝早仲见过佢，不过冇几耐佢就出咗去喇！
485 明仔，聼讲你同苏珊周不时嚟呢度饮下午茶。
係啊呢度嘅环境几好，咖啡嘅味道又唔错！
486 你得唔得闲啊，帮手落街买樽豉油返嚟啊。
仲有，顺便将厨房啲垃圾攞埋落去啦！
487 苏珊，你乜嘢回事，点解著拖鞋返工嘅。
我嘅脚趾尾唔小心整亲吖，所以咪著拖鞋囉！
488 妈咪我嘅胶擦就快用晒啦，记得帮我买。
妈咪听日同你买，顺便同你买个卡通笔盒！
489 苏珊记住爽手啲啊，千奇千祈咪咪咪摸摸。
知道喇，做乜咁长气噶，你讲咗好几次啦。
490 你睇下你鬍鬚邋遢嘅样，一阵出门前记住睇下啲鬚。
放心啦，去外父外母一定会执到正正嘅！
第50课
491 妹猪啊，你都咁大个女喇。点解仲係大唔透（幼稚）噶。
妈咪你一啲都唔明，我呢啲叫做童真！
492 你噉样做，肯定笑甩人棚牙，你要好好哋谂清楚。
唔理咁多喇，想搞掂呢件事，就唔可以在意咁多！
493 你做乜唔劝佢，你明知道噉样做係行唔通嘅。
话过好多次喇，佢太硬颈啊，等佢撞下板先有用！
494 记得读书嗰阵时，买咗好多卡带，有时仲会将锺意嘅歌录埋一齐。
最开心嘅就係放学嘅时候，同你一齐听住walkmam（随身听），慢慢穿过巷仔行去车站。
495 苏珊你个鼻哥做乜嘢生咗粒暗疮嘅。
呢排喺出边经常食烧烤有啲热气啊！
496 你点解眼湿湿嘅，係唔係仲係度惗紧电影裏边嘅情节。
呢部电影拍得几好，喺入边有我哋普通人嘅影子！
497 呢次大镬喇，水洗都唔清哦，点算好？放心啦，冇事嘅，大家都知道你係点样嘅人！
498 你睇唔出嚟咩，佢係特登托你手踭，唔係想帮手啊。
真係冇谂到咁多年朋友一啲面都唔畀！
499 啱开始嘅时候。照版煮糊就得架啦，好简单架。
噉样啊，我试下先睇下点样，唔该晒啊！
500 明仔你喺度做紧乜嘢呀，得唔得闲出嚟宵夜。
我啱啱瞓低，难得起身啊，下次先啦！
第51课
501 苏珊睇起身好开心喎，乜嘢回事呀。
啱啱收到信息考试通过咗啦！
502 我正话喺楼下睇到明仔同苏珊急急脚咁走咗喎。
老世啱啱打电话返嚟，嗌佢哋去机场接人啊！
503 苏珊，嗰件事而家点样，都搞咗好耐啦。
都唔知点解，一啲声气都冇啊，真係好奇怪！
504 你觉得啱啱面试面嗰个后生点样，
履历表写得几好，不过感觉好似冇乜料到！
505 呢次嘅方案係边个做架，做得几好噃。呢个係明仔一手一脚做架，聼讲挨咗两晚通宵。
506明仔，你喺上高做乜嘢，睇上去危危乎噉。
檎到咁高，太牙烟啊，仲唔快啲落嚟！
507 朝早太急na，唔记得打卡，呢次大剂喇。
真係激气，呢个月嘅全勤奖，睇嚟冇行喇！
508 你咪劳气啦，你要知道仔大仔世界。
路係要佢哋自己行嘅，我哋做家长嘅又唔识放手！
509 阿美，你乜嘢回事，点解手揗脚震架（手脚发抖）。
啱啱有几隻蜜蜂飞入办公室，点样都赶唔出去！
510 你搵明仔喇，呢单嘢唔关我事，而家係佢负责嘅。
我搵唔到佢，你知唔知道佢去咗边度？
第52课
511 你乜嘢回事，唔帮手就算啦，仲喺度单单打打。
你噉样纸箱骂槐，含沙射影，真係好乞人憎！
512 你嘅冰糖葫芦喺边度买噶，睇起身好大粒啊。
就喺嗰边嘅冷巷入边，内边有好多零食卖。
513 晨早流流，点解咁惊青啊，发生咗乜嘢事。
聼讲公司隔篱嘅动物园，跑咗隻老虎出嚟！
514 嚟一齐饮胜祝大家身体健康万事如意。仲有就係祝大家工作顺利财源广进！
515 妹头，你老窦喺度搞紧乜嘢，嗌佢落楼攞啲嘢。
老窦喺度整紧水喉，行唔开，等我落嚟攞啦。
516 明仔都就嚟11点喇，点解仲唔见佢嚟嘅。
佢嘅嘢寻日畀人踢爆左，估计唔会再嚟啦！
517 你哋两个百厌星，做乜嘢打起身嘎，系边个先喐手嘅。
係细路先喐手嘅，佢收埋我嘅游戏机仲唔承认！
518 你表错情喇，唔使企起身啦，老细讲嘅唔係你。
老世讲嘅係新嚟嘅同事，咁啱佢嘅名同你一样。
519 你唔使闭翳啦，呢单嘢等我同明仔嚟处理啦！
我哋熟悉流程。话咁易就可以搞掂你即管放心啦！
520 真係睇唔出，佢做嘢咁鬼熟手，噉样我就放心喇。
你咪睇佢年纪细，不过佢从事呢个行业已经好多年啦！
第54课
531咪唔记得你係公司嘅负责人，你咪谂住卸膊啊。
要知道呢单嘢之所以会搞成咁样，同你有好大关係！
532 呢啲嘢点解三尖八角嘅，因住吉亲（扎）手指啊，你
仲係戴返手套先嚟执拾啦噉样安全啲！
533 妹猪，一日到黑净係挂住柜桶入边嘅零食。你唔知道成日食零食对身体唔乜益嘅咩？
534 我谂住摘啲鸡屎果（番石榴）俾佢，唔知道佢锺唔锺意。这种树上熟嘅鸡屎果佢自细就好锺意食。
535 衰仔包，喺出边咪买好多多噉，唔好多管闲事。记住要低调啲，要知道讲多，祸从口出啊！
536 苏珊，记住唔好去路口嗰间生果店买嘢啊。听陈师奶话，佢哋嘅水果唔新鲜仲经常呃秤架！
537我劝你仲係唔好等佢喇，咪旨意佢会帮手。你咪唔记得佢不嬲都净係得把口（会讲唔会做）架。
538 小朋友一唔係你哋去前边嘅空地度玩啦。呢度太多人行出行入嗱，有时仲有货车入嚟！
539 老窦。你细个时冇手机有冇电视有乜嘢玩啊？
老窦细个时最锺意坐喺收音机隔篱听古仔！
540 聼讲明仔同苏珊喺度拍紧拖，你觉得佢哋点样。
我觉得佢哋两个郎才女貌，睇落都几登对（班配）啊。
第55课
541 聼讲你近排去咗拍电影喔系唔係啊。係啊，不不过我喺剧组入边係个茄哩菲嚟咋？
542 明仔听你老窦话，你毕业后入左间大公司。
你咪听佢车大炮，我啱啱入
公司，仲係个二打六嚟架！
543 你睇话口未完讲曹操曹操就到啦。
真係冇谂到会咁桥啊，今日你真係有口福喇！
544 飞哥佢明明剃你眼眉（当众出丑），你点解唔嬲嘅。
我唔嬲係因为佢并唔了解事情嘅真相。
545 你有冇发觉仔仔生性咗好多，唔似以前咁奀皮（调皮）。
初中毕业后，佢自觉咗好多，仲识得替人着想。
546 都就嚟年尾喇唔知道今年有冇奖金啊。
今年业绩唔错，应该比旧年多，出年估计会更好！
547 你点解唔早啲讲，你睇而家俾佢搞到一镬泡啦。
对唔住啊，我冇惗到会搞成噉样，最衰都係我啦！
548 飞哥好耐冇见，睇起身捞得好掂噉喎。
今时唔同往日，你终于挨出头啦辛苦晒啊！
549 你睇佢龙精虎猛嘅样，一啲都唔似老人家。
佢啊，每日都早睡早起仲坚持锻炼。
550 老窦妈子，你哋都睇咗咁耐喇，有冇啱心水嘎？
这款空调唔错，我哋谂住同你间房揾部新嘅。
第56课
551 明仔生人唔生胆，咁好嘅机会，都唔上去同佢表白。
係囉，聼讲佢暗恋咗人哋好耐喇，一直唔敢讲出嚟！
552 飞哥你睇佢甘鬼奀廋。能唔能搞掂呢单嘢？
人不可貌相，你咪睇佢噉样，佢呢个人好醒目噶！
553讲笑搵第样（开玩笑找别）啊，你唔知道乜，佢好容易当真架。
你讲嘅都啱嘅，有啲人係唔能够是但求其讲笑架！
554 你睇你啊身水身汗，件衫湿晒喇，去咗边度玩啊。
我同明仔佢哋去咗打羽毛球，好耐冇玩啦！
555 阿美，我仲係心大心细，你话点算好。寻日我哋唔係都啊商量好了乜，一于咁定啦！
556 你乜嘢回事，点解讲嘢阴声细气嘅，唔似你性格喎。
冇计啦，我都唔係想噉样啊，边个叫我激亲咗佢！
557 明仔，你咪开口埋口都係佢好唔好。你应该知道，我哋大家都唔想听到佢嘅名啊！
558 妈咪而家几点钟啊快天光未啊？
仲未到六点，你瞓多阵啦，妈咪整好早餐叫你！
559 你乜嘢回事，啱啱咁好嘅机会你都唔识得把握？
娇姐，苏州过后唔听唔到啊真係嘥晒（可惜）喇！
560 你有冇发觉铭仔呢份人好易话为（随和）啊，唔似佢哋讲嘅噉样。
係啊，佢几好架，我哋呢啲新人都係佢培养出嚟嘅！
第57课
561 听左半个钟喇，不过我仲係觉得一头雾水。
噉梗係啦，寻日嘅课你冇嚟上，梗係听唔明啦！
562 仔仔，出嚟做嘢唔到万不得已，千祈唔好犯众憎。
要知道如果噉样嘅话，噉你以后嘅路会好难行！
563 呢单嘢真係好难搞，呢次都唔知道点算好啦。
不如不如搵辉哥帮手，佢识得人多话唔埋可以搞掂！
564 你乜嘢回事呀，睇上去好似无晒符噉嘅样。
你快啲帮手谂下计，一阵领导就过检查啊。
565 就嚟落雨喇，天棚上边嘅衫收咗未啊？
啱先我哋啊上去攞嘢嘅时候顺便收咗啦！
566 你睇下，呢个正一靠害（存心坑人）啊，边有噉样做嘢
嘎。
下次啊你要因住啲啦，唔可以咁轻易信晒人哋！
567 放咗假咁耐喇，点解唔见你做作业啊。急乜嘢喎，未有耐开学啊，仲有排啊！
568 你都唔知道，妹猪出世时，同而家一啲都唔似。
咁梗係啦，女大18变越变越好睇。
569 明仔，你再係噉优柔寡断，好容易两头唔到岸。
我都唔係想咁样，不过而家嘅我 真係好难取捨！
570 明仔上个礼拜嗰单嘢搞掂未啊。
我啱啱谂住搵你，而家半天吊啊，真係好麻烦！
第58课
571苏珊睇落好似有啲唔开心，边个激亲你啊。
谂谂都知道啦，除咗明仔仲有边个会激嬲佢？
572 呢种生果做乜嘢咁平嘅，以前都唔知几贵。
噉梗係啦，以前物以稀为贵，而家周街都係啊！
573 你乜嘢回事，呢个道理一字咁浅，你点解仲唔明白。
我都唔知係乜嘢回事，估计係当 局者迷，旁观者清！
574 娇姐，听日有乜嘢安排，得唔得闲去唱k啊。
你唔早啲讲，我啱啱约咗朋友去电发。
575 公司点解唔安排明仔去处理嗰啲嘢嘅。冇咁易啊，要食
脑先得架，明仔唔合适！
576 啱先真係好淤（丢脸）啊，冇谂到佢会咁样对我。
佢呢份人嘅脾气就係噉样！你唔使理佢架！
577 你咪睇佢咁大个人啊，其实仲係冇定性。
佢自细就係噉样，我哋话过佢好多次啦！
578 明仔，你落班返到屋企，有冇帮手做下家头细务。
一般喺周末嘅时候，会帮手搞下卫生煮下饭！
579 聼讲嗰度环境好複杂，记得有一眼关七啊。
知道喇，放心啦，我都咁大个人啊，识得执生嘅啦！
580 嗰啲嘢你记住放返落夹万，千其咪搞唔见咗。
我知道嗰啲嘢对你嚟讲好重要，我会放好嘅啦！
第59课
581 聼讲楼下嘅奶茶店几好，一唔係整杯饮下。
你都唔知道而家争崩头咁多人，等人少啲先点啦！
582 都咁夜喇，仲落紧大雨，佢点解仲敢出去嘅？
你唔知道啊，佢呢份人啊胆生毛架！
583 你睇下佢唔愤气（不服气）嘅样，跟住落嚟点样做好。
下昼仲有两场比赛，我哋应
该多啲鼓励佢！
584 终于一天都光晒，噉样明仔佢哋可以放心啦。
佢哋今次真係守得云开月见月明，好彩冇放弃！
585 你都唔知道，我到而家仲係觉得心惊惊。
啱先个场雨实在係太大喇，都唔知道跑边度好！
586 真係冇谂到哩单嘢竟然咁顺摊就搞掂。呢个离唔开呢几个月嚟佢哋加班加点嘅努力！
587讲真嗰句，呢单嘢真係唔到你话事啊。
係啊，呢单嘢牵涉轻到嘅人实在太多啦！
588 明仔，你今日真係好彩啦，行运行到脚趾尾啊。
係啊我都冇谂到，后尾我竟然中左个大奖！
589 呢啲嘢好紧要，佢谦赖咗冇几耐，怕唔怕佢出蛊惑（耍花样）？
放心啦，冇事嘅，我信得过佢，疑人不用用人不疑！
590 你哋两兄弟记住要团结，一齐拍住（配合）上啊！
老窦，我哋知道嘅喇，兄弟同心其利断金！
第60课
591 唔係话同朋友出去食饭嘅咩，点解返嚟咁早嘅。
佢放飞机啊，话临时有事嚟唔到，真係激气！
592 今日啲餸点解淡蒙蒙嘅，一啲味道都冇啊。
我谂起身啦，炒餸时接咗个电话，后嚟就唔记得落盐。
593 明仔，快啲过嚟呢边，帮我同阿妹影张相。
哗烟雨朦胧，咁仲有埋彩虹，真係好靓啊！
594 街口嘅咖啡店有冇去试过，啲咖啡嘅味道点样。
久唔久都会去坐下，啲味道几好，环境又唔错。
595 咁好嘅嘢你都睇唔出嚟，今次走宝啦。
而家谂下宝物沉归底呢，呢句话真係冇错！
596 今年你点解唔参加比赛嘅，旧年你都有份嘅喎。
你以为娇姐我仲係18廿二咩，跑唔郁喇！
597 今次我真係攞嚟衰啦，早知道我听你话啦。
呢个咪就係唔听老人言吃亏在眼前哦！
598 呢次会议如果佢仲係唔听你支笛（指挥你点算好。
对嗰啲唔服从管理嘅人，我会揸正嚟做嘅！
599 你咪睇佢年纪咁细，佢呢个型啊好醒目架。
係啊，你睇佢讲嘢有纹有路嘅样就知道啦！
600 你点可以懵到上心口嘎，佢嘅话唔可以相信噶。
你第日要记住，佢呢个人啊讲嘢冇句真嘅！
编 后 记
放弃总是简单，坚持太难。
每一种学习都是要坚持，坚持才有成效，坚持才知道学会没有，道理是这样的简单，但要落实到行动上，这就要看是否有定力了。
开始编这本书时，前面600单词都觉得没问题，一看就懂，只是没有专门收拢一堆来看，而且应用方面还不那么熟悉，只是加强应用，并放在词境中去熟悉就行了。
而600个粤语句子，初看时觉得很点内涵，值得收拢来学，但过程中却发现，说是600句，其实用词用语方面没啥亮点，语法基本没展示粤语的面貌，重点也不突出，就不想再往下学了。
但后来只为一个坚持，因为半途而废是我们学习的矛盾，学习过程中一旦发现不如意，就想着放弃。这次要求自己一定坚持学完，至少要看清楚全貌再说。
有人说，人生的每一步都不是白走的，学习也是这样，上了路，坚持下来了，每一步都不是白走。虽然觉得整个过程没啥养份，但毕竟一字不漏学完了600句，收获就是逼得你停开口说，口语能力确实提高了。
这本书编完了，还要编下一部，直到完全学成个老广的样子才算数。能否在坚持的过程中，找到值得坚持的理由，真要看运气。
但愿接下来好运不断吧！
山山妖工作室
增值电信业务经营许可证：陕B2-20210327 | 
陕公网安备 61102302611033号